შემოგვიერთდით Facebook_ზე და მიიღეთ პასუხი ნებისმიერ კითხვაზე
Geo Eng
უკან
როგორ ავირჩიოთ გაზქურის ზედაპირი

1. ტიპები

ზედაპირი შეიძლება იყოს გაზის (აირზე მომუშავე), ელექტრო და კომბინირებული. ასევე ზედაპირი არის როგორც ჩასაშენებელი, ასევე მაგიდაზე დასადგამი. 1 და 2 კომფორიანი ზედაპირების სიგანე ძირითადად 30 სანტიმეტრია, მათ ,,დომინოს" ტიპს უწოდებენ. ელექტრო ზედაპირებს მიეკუთვნება აგრეთვე ინდუქციური ქურები.

 

უმეტესად გავრცელებულია 4 კომფორიანი გაზის ზედაპირები (გაზქურები), რომლებიც მუშაობს ბუნებრივ, ან თხევად აირზე. არსებობს ასევე 1-5 და მეტ კომფორიანი ზედაპირები.  კომფორები, ძირითადად, სხვადასხვა ზომის და სიმძლავრისაა, უნდა შეარჩიოთ ჭურჭლის ზომის მიხედვით. სიმძლავრე მერყეობს 1-დან 4,6 კილოვატამდე. მაგ: 4 კომფორიან ზედაპირს გააჩნია ძირითადად 1 ეკონომიური კომფორა-1 კვტ., 2 სტანდარტული კომფორა 1,7-1,9 კვტ. და 1 დიდი-3 კვტ. ან ე. წ. ,,Wok" კომფორა, რომლის სიმძლავრეა 3,2-3,6 კვტ.  ,,Wok" კომფორას გააჩნია ორკონტურიანი ალი, ამიტომ მას იყენებენ კერძის სწრაფად მოსამზადებლად, წყლის სწრაფად ასადუღებლად.

 

ყველაზე მარტივ ელექტრო ზედაპირებს (ელექტრო ქურებს)  გააჩნია თუჯის კომფორები (ე. წ. ,,ბლინი"), რომლებიც განხვავდება ზომით და სიმძლავრით. თუჯის კომფორა, რომელსაც შუაში აქვს დიდი წითელი წერტილი, გაძლიერებული სიმძლავრისაა და უფრო სწრაფია ვიდრე ჩვეულებრივი. საკმაოდ გავრცელებულია მინა-კერამიკის ზედაპირები, რომლებშიც ჩამალულია გოფრირებული ფირის მსგავსი გამაცხელებელი ელემენტი. ასეთი კომფორების მოქმედების ზონა შემოხაზულია თეთრი კონტურით. აღნიშნული კომფორები ძალიან სწრაფად ცხელდება. ის შეიძლება იყოს ორ და სამ კონტურიანი, ასევე შეიძლება გააჩნდეს დამატებითი ოვალური გაცხელების ზონა. ყველაზე ეფექტური და ეკონომიურია ინდუქციური ქურები, რადგან მათი დანაკარგი 10 %-ს არ აღემატება. ეს განპირობებულია იმით, რომ ინდუქციური ქურის შემთხვევაში ცხელდება არა ქურა, არამედ ჭურჭლის ძირი. მაშინაც კი, როცა ჭურჭლის ძირის დიამეტრი ნაკლებია ინდუქციური კომფორას დიამეტრზე, კომფორას ცარიელი ნაწილი ფაქტიურად ცივია. ამავე დროს უფრო უსაფრთხოა, რადგან კომფორა ჭურჭლის აღებისთანავე ითიშება. უნდა გაითვალისწინოთ, რომ ინდუქციური ქურისათვის სპეციალური ჭურჭელია საჭირო (ძირითადად ჭურჭელი, რომელიც იზიდავს მაგნიტს).

 

კომბინირებული ზედაპირები უფრო პრაქტიკულია, რადგან გვაქვს არჩევანი, თუ რომელი  ენერგიის წყარო გამოვიყენოთ, აირი თუ ელექტრო ენერგია. ასეთი ზედაპირებიც შეგიძლიათ შეარჩიოთ, ზომის, დიზაინისა და ფუნქციების მიხედვით.

 

 

2. გაბარიტები და ზომები.

ქურის შეძენისას, პირველ რიგში ყურადღება უნდა მიაქციოთ მის გაბარიტებს, ქურის ზომაზეა დამოკიდებული, რამდენად კარგად "ჯდება" იგი სამზარეულო ინტერიერში და რამდენად კომფორტული იქნება სამუშაოდ  თქვენთვის. თქვენ შეგიძლიათ  აირჩიოთ როგორც ქურის სტანდარტული ასევე განსხვავებული სიგანის მოდელები (სიღრმე ძირითადად 51 სმ-ია).

 

ქურის სიგანე მერყეობს 30 სმ-დან (დომინოს ტიპის) 90 სანტიმეტრამდე. სიღრმე ძირითადად 51 სმ-ია. შეგიძლიათ შეარჩიოთ როგორც ჩასაშენებელი, ასევე მაგიდაზე დასადგამი ზედაპირი. როგორც წესი ჩასაშენებელი ქურების არჩევანი დიდია. ზედაპირის შერჩევისას უნდა გავითვალისწინოთ არა მარტო დამზარეულოს სიდიდე, არამედ გამწოვის სიგანე. ზედაპირის სიგანე არ უნდა აღემატებოდეს გამწოვის სიგანეს. სტანდარტულ სიგანედ ითვლება 60 სმ.

 

3. ზედაპირის მასალა

იმისათვის რომ ამოვირჩიოთ ხარისხიანი  სანდო ზედაპირი, ყურადღება უნდა მივაქციოთ მასალას რისგანაც ის არის დამზადებული. ზუსტად მასზეა დამოკიდებული ზედაპირის ტემპერატურული და მექანიკური მდგრადობა. ყველა ნივთიერებას აქვს თავისი თვისებები და უპირატესობები, რომლის მიხედვითაც უნდა აირჩიოთ იგი.

 

მომინანქრებულ (ემალირებულ) რკინას აქვს მაღალი ჰიგიენური თვისებები, შეიძლება შეგვხდეს სხვადასხვა ფერის და არც ისე ძვირი ღირებულების. უჟანგავი ფოლადი (inox)  უფრო ძვირია, მაგრამ უფრო გამძლეა, არ ამოტყდება დარტყმისას, ადვილად იწმინდება. სპეციალურად დამუშავებული ალუმინის შენადნობი მდგრადია დაკაწვრის მიმართ და მოითხოვს მინიმალურ მოვლას.

 

მინა-კერამიკა ცხელდება და ცივდება სწრაფად, რადგან მას გააჩნია დადებითი თვისება-კარგად ატარებს სითბოს ვერტიკალურად (ანიზოტროპულობა), ჰორიზონტალურად კი ცუდად, ამიტომ ფაქტიურად ცხელდება მხოლოდ გამაცხელებელი ელემენტით შემოფარგლული ნაწილი, კომფორა, ხოლო მის გარშემო სივრცე პრაქტიკულად ცივია. ასევე არ განიცდის ,,თერმოშოკს". ასეთი ზედაპირი შედარებით უსაფრთხოა მუშაობისას.

 

მინაკერამიკული ზედაპირის გასაწმენდად არსებობს გელები და სხვადასხვა სპეციალური სარეცხი საშუალებები. ჩვეულებრივმა სარეცხის ფხვნილებმა შეიძლება დააზიანონ  ზედაპირი. ასევე ყურადღება მიაქციეთ რომ ასეთ ქურებზე არ აღმოჩნდეს ალუმინის ჭურჭელი ან ქვაბები არასწორი ძირით. ზედაპირი ადვილად იწმინდება, მაგრამ საჭიროებს სათუთ მოპყრობას. ზედაპირზე შაქრის, ან ტკბილი პროდუქტის მოხვედრისას, მალევე უნდა მოვწმინდოთ.

 

გაზის ზედაპირები (გაზქურები) შეიძლება იყოს დამზადებული ნაწრთობი მინისაგან, რომელიც ადვილად იწმინდება და შედარებით იაფია მინა-კერამიკის ზედაპირთან შედარებით.

 

 

4. დამატებითი ფუნქციები და მახასიათებლები

გაცილებით მეტი დამატებითი ფუნქცია შეიძლება გააჩნდეს ელექტრო ზედაპირებს გაზის ზედაპირებთან შედარებით, მაგრამ ეს უკანასკნელიც გვხვდება სხვადასხვა სასარგებლო დამატებითი ფუნქციით მაგ: როგორიცაა დამატებითი უსაფრთხოების ღილაკი, ავტომატური ანთების სისტემა ,,Flame Tronik".

 

გაზის ზედაპირებს (ელიტარულ მოდელებს) შეიძლება გააჩნდეს ალის ავტომატური ანთების სისტემა ,,Flame Tronik", რომელიც ალის ჩაქრობის შემთხვევაში ეცდება აანთოს კომფორა, ცდა შეიძლება განმეორდეს 3-4-ჯერ და თუ კომფორა არ აინთო (რაღაც მიზეზების გამო, მაგ: ორპირი ქარის შემთხვევაში), სისტემა გადაკეტავს გაზის მიწოდებას. ასეთი სისტემით აღჭურვილი ზედაპირები უნდა იყოს დაკავშირებული ელექტრო ქსელთან.

 

ელექტრო ზედაპირების შემთხვევაში დამატებითი ფუნქციების რაოდენობა გაცილებით მეტი შეიძლება იყოს, ვიდრე გაზქურებში. მაგ: ფუნქცია ,,PowerBoost" - სპეციალური ინდუქციური მოწყობილობა რომელიც უზრუნველყოფს სიმძლავრის გაზრდას მეზობელი კომფორას ხარჯზე, რაც თავისთავად  იწვევს სწრაფ გაცხელებას. აღნიშნული ფუნქციის მეშვეობით ინდუქციური კომფორის  სიმძლავრე იზრდება 50%-ით და მოქმედებს 35%-ით უფრო სწრაფად. დამახსოვრების ფუნქცია ,,Memory" - საშუალებას გვაძლევს დავამახსოვრებინოთ ჩვენს მიერ შერჩეული პარამეტრები (ტემპერატურა, მომზადების დრო და ა.შ.). ასევე დიდი გამოყენება აქვს ელექტრო ზედაპირებში სენსორებს და ინდიკატორებს. ტემპერატურული სენსორების საშუალებით რეგულირდება თითოეული კომფორას  მითითებული ტემპერატურა. მაგ: ელექტრო ქურას SIEMENS ET875MC31D გააჩნია სენსორი ,,KochSensor"-ინფრაწითელი სხივის საშუალებით კონტროლდება  სითხის ტემპერატურა ჭურჭელში. გაცხელების ზონა მუშაობს მანამ, სანამ არ მიიღწევა მითითებული ტემპერატურა, გაისმის ხმოვანი სიგნალი, ამის შემდეგ დუღილი მიმდინარეობს ავტომატურ რეჟიმში.  ასეთი სისტემა თავიდან აგარიდებთ რძის გადმოსვლასაც კი. მართვის პანელზე განთავსებული ინდიკატორები გვაწვდის სხვადასხვა ინფორმაციას, მაგ: დარჩენილი სითბოს ინდიკატორი გვიჩვენებს, რომ კომფორა ჯერ კიდევ ცხელია და არ უნდა შევეხოთ ხელით. ზედაპირის შერჩევისას გაითვალისწინეთ, რომ დამატებითი ფუნქციების სიმრავლე ზრდის ნივთის ფასს და უნდა შეარჩიოთ ისეთი ძირითადი ფუნქციები რაც გჭირდებათ.

 

 

5. მართვა

გაზის ზედაპირების და თუჯის ელექტრო კომფორების მართვა ხორციელდება ძირითადად მექანიკური რეგულატორების საშუალებით, ხოლო მინა-კერამიკის ელექტრო ზედაპირებში გამოყენებულია ელექტრონული მართვის სისტემა (ძირითადად გამოიყენება სენსორული მართვის ღილაკები).

 

მინა-კერამიკულ ელექტრო ზედაპირების მართვის პანელზე განლაგებულია, ძირითადად, სენსორული მართვის ღილაკები, რომლებზეც უბრალო თითის დაჭერით შესაძლებელია ჩართვა, გამორთვა და, საერთოდ, მართვა. ასეთ მართვის პანელზე ინფორმაციას ვიღებთ ინდიკატორებისა და ეკრანის საშუალებით. შეგიძლიათ მიუთითოთ ყველა კომფორას ინდივიდუალური გაცხელების სიმძლავრე და მუშაობის ხანგრძლივობა.  თანამედროვე მოდელებში გავრცელდა სენსორული მართვის ახალი და უფრო გაადვილებული ტექნოლოგია ,,TouchSlider"-სლაიდერული სენსორული მართვა, ე. წ. ,,სენსორული ხალიჩა", რომელზეც თითის გაყოლებით, ან შესაბამის პოზიციაზე თითის დადებით სწრაფად  შეგვიძლია შევცვალოთ ელ. ქურის ტემპერატურა, სიმძლავრე. დამატებითი ფუნქციების შესაბამისი ღილაკები მართვის პანელზე გამოსახულია პიქტოგრამების სახით, რომელზეც თითის ოდნავ შეხებით შეგიძლიათ აირჩიოთ სხვადასხვა ფუნქცია. ზედაპირებს ორმაგი ან სამმაგი გაცხელების ზონით, გააჩნიათ დამატებითი ღილაკი, რომლის საშუალებით შეგიძლიათ გაზარდოთ გაცხელების ზონა. ტაიმერი შეიძლება იყოს ორგვარი: ერთი რომელიც მითითებული დროის ამოწურვის შემდეგ გამოსცემს ხმოვან სიგნალს, მეორე ტაიმერის საშუალებით შეგვიძლია მივუთითოთ თითოეული კომფორას ჩართვის და გამორთვის დრო (მუშაობის ხანგრძლივობა). გაითვალისწინეთ, რომ დამონტაჟებული ტაიმერი მუშაობს ქსელის დენზე და არა ცალკე გენერატორზე, ამიტომ ელ. ენერგიის მიწოდების შეფერხების ან  გამორთვის შემთხვევაში აუცილებელია დროის კორექტირება.

 

 


 

სხვა რჩევები
როგორ ავარჩიოთ LCD (თხევადკრისტალური) ტელევიზორი
როგორ ავარჩიოთ LED ტელევიზორი
როგორ ავირჩიოთ 3D ტელევიზორი
როგორ ავირჩიოთ პლაზმური ტელევიზორი
როგორ ავირჩიოთ ციფრული ფოტოაპარტი
როგორ ავირჩიოთ ვიდეოკამერა
როგორ ავარჩიოთ DVD პლეერი
როგორ ავარჩიოთ Blu-ray პლეერი
როგორ ავირჩიოთ სახლის კინოთეატრი
როგორ ავირჩიოთ მობილური ტელეფონი
როგორ ავირჩიოთ რადიოტელეფონი
როგორ ავარჩიოთ ნოუთბუქი
როგორ ავირჩიოთ მონიტორი
როგორ შევარჩიოთ კომპიუტერის კომპონენტები
როგორ ავარჩიოთ პრინტერი
როგორ ავირჩიოთ მაცივარი
როგორ ავირჩიოთ სარეცხი მანქანა
როგორ ავირჩიოთ ჭურჭლის სარეცხი მანქანა
როგორ ავირჩიოთ ქურა
როგორ შევარჩიოთ გამწოვი
როგორ ავარჩიოთ კონდიციონერი
როგორ შევარჩიოთ წყლის გამაცხელებელი
როგორ შევარჩიოთ ელექტრო ღუმელი
როგორ შევარჩიოთ გამათბობელი
როგორ ავარჩიოთ მტვერსასრუტი
როგორ შევარჩიოთ გამათბობელი

საიტის სრული ვერსია