შემოგვიერთდით Facebook_ზე და მიიღეთ პასუხი ნებისმიერ კითხვაზე
Geo Eng
უკან
როგორ ავარჩიოთ კონდიციონერი

1. კონდიციონერის ტიპები

პირველ რიგში უნდა განვსაზღვროთ რა ტიპის კონდიციონერი გვჭირდება და სად ვამონტაჟებთ. არსებობს სხვადასხვა ტიპის კონდიციონერი: სპლიტ სისტემა, კოლონური, მობილური, და სხვა. ყველაზე გავრცელებულია სპლიტ სისტემა (ერთი გარე ბლოკი და ერთი შიდა ბლოკი).

თანამედროვე კონდიციონერებში გამოიყენება ახალი ფრეონი R410a, რომელიც არის ეფექტური და ეკოლოგიურად სუფთა (არ აზიანებს ოზონის შრეს).

თუ თქვენ გსურთ თანამედროვე და მრავალფუნქციური კონდიციონერი, არჩევანი შეგიძლიათ შეაჩეროთ სპლიტ სისტემაზე (ძირითადად კედელზე დასამონტაჟებელი), რომელიც შედგება გარე და შიდა ბლოკებისაგან. სპლიტ სისტემის კონდიციონერები გამოირჩევა დაბალი ხმაურის დონით, აქვთ დისტანციური მართვის პულტი, რომლითაც შეიძლება ავირჩიოთ მუშაობის რეჟიმები და ფუნქციები. მაგ: გაგრილება, გათბობა, ტენის ამოშრობა, ვენტილაციის რეჟიმი, ავტომატური რეჟიმი და სხვა. ამ სისტემის კონდიციონერების უმეტესობას გააჩნია აგრეთვე ტაიმერი, რომლის მეშვეობითაც შესაძლებელია ჩართვის და გამორთვის დროის მითითება.

 

2. კონდიციონერის სიმძლავრე

ძირითადად კონდიციონერს აქვს სიმძლავრის ორი მაჩვენებელი, რაზეც უნდა გავამახვილოთ ყურადღება შეძენისას. ეს არის ელექტროენერგიის მოხმარების და გაგრილების სიმძლავრე. ამ სიმძლავრეების შეფარდება არის დაახლოებით 1:3. კონკრეტული ფართისთვის უნდა შევარჩიოთ შესაბამისი გაგრილების სიმძლავრის მქონე კონდიციონერი.

სტანდარტულ პირობებში 1 კვტ. (უმეტესად კონდიციონერის გაგრილების სიმძლავრე მოცემულია BTU-ში, 1 ვტ.=3,412 BTU) გაგრილების სიმძლავრე საკმარისია დაახლოებით 8-10 მ2 ფართისთვის. ასეთი მარტივი ფორმულით შერჩევისას უნდა გავითვალისწინოთ აგრეთვე ისეთი ფაქტორები, როგორიცაა:

  • შენობის ფართობი;
  • ჭერის სიმაღლე;
  • შემინული ფართი (ფანჯარა);
  • რომელ მხარეს არის ფანჯარა;
  • თბოიზოლაცია;
  • ელექტრო მოწყობილობები, რომლებიც გამოყოფს სითბოს;
  • ადამიანების რაოდენობა შენობაში;
  • შენობის დანიშნულება და ა. შ.

აღნიშნული ინფორმაცია უნდა მივაწოდოთ მაღაზიის კონსულტანტს, რომელიც შეგვარცევინებს საჭირო სიმძლავრის კონდიციონერს. არასტანდარტულ პირობებში უმჯობესია კონდიციონერი შევარჩევინოთ სპეციალისტს (სერვისის წარმომადგენელს). დაბალი სიმძლავრის კონდიციონერის შერჩევისას, ვიდრე საჭიროა, ჰაერის გასაგრილებლად საჭირო იქნება მეტი დრო, კონდიციონერი იმუშავებს შეუსვენებლად მაქსიმალური დატვირთვით, იზრდება ხმაურის დონე და ელ. ენერგიის ხარჯი, საბოლოო ჯამში კონდიციონერი მალე გამოვა მწყობრიდან.

თუ გვინდა, რომ სიმძლავრის რეგულირება ხდებოდეს ავტომატურად, ოთახში არსებული ჰაერის ტემპერატურის მიხედვით, მაშინ უნდა შეიძინოთ კონდიციონერი ინვერტორული მართვით. ოთახში მითითებული ტემპერატურის მიღწევისას კონდიციონერი მუშაობს დაბალი სიმძლავრით (ეკონომიურ რეჟიმში) და ინარჩუნებს მითითებულ ტემპერატურას. სტანდარტულთან შედარებით. ინვერტორული კონდიციონერი არის ეკონომიური 30-35 %-ით და ექსპლუატაციის ვადაც მეტი აქვს.

3. გათბობის რეჟიმი

ძირითადი ფუნქციის - გაგრილების გარდა, თანამედროვე კონდიციონერებს შეუძლია ჰაერის გათბობა. უმეტესად კონდიციონერებს გათბობის სიმძლავრე ოდნავ მეტი აქვს ვიდრე გაგრილების. მაგ: გაგრილების სიმძლავრე თუ არის 12000 BTU, გათბობის სიმძლავრე შეიძლება იყოს 12500 BTU, მაგრამ გასათვალისწინებელია, რომ ტემპერატურის კლებასთან და ტენიანობის მატებასთან ერთად იკლებს გათბობის ინტენსივობა. ამიტომ საჭიროა ალტერნატიული გათბობის წყაროს არსებობა.

კონდიციონერით გათბობა არის გაგრილების შებრუნებული პროცესი, ანუ შიდა ბლოკიდან ხდება სითბოს გამოყოფა, ხოლო გარე ბლოკიდან-სიგრილის. კონდიციონერს აქვს გარე ბლოკის მუშაობის ტემპერატურული დიაპაზონი. ამიტომ უნდა შევარჩიოთ კონდიციონერი, რომელიც იმუშავებს ჩვენთვის მისაღებ გარემოში. ძირითადად ჩვენს ქსელში გავრცელებულია კონდიციონერები რომელთა  მუშაობის გარე ტემპერატურული დიაპაზონია -7 0C,  +43 0C, ან  -15 0C, +50 0C (მითითებულია მაქსიმალური მონაცემები).

4. ტენის ამოშრობა

მაღალი ტენიანობის გარემოში შეუცვლელია კონდიციონერები ტენის ამოშრობის რეჟიმით. ის ამოაშრობს ჭარბ ტენს ოთახში და შექმნის კომფორტულ გარემოს.

ტენის ამოშრობისას კონდიციონერის თბოგამცვლელზე ხდება ტენის კონდენსირება და სპეციალური მილის საშუალებით გაედინება გარეთ. ასეთი კონდიციონერების გამოყენება მოსახერხებელია ისეთ რაიონებში სადაც ხშირია წვიმები და შესაბამისად ტენიანობა მომატებულია.

5. ჰაერის გაწმენდა

თანამედროვე კონდიციონერებში გამოყენებულია მრავალი სხვადასხვა სახის ფილტრი, რომელიც ფილტრავს ჰაერს მტვრის ნაწილაკებისაგან, მიკრობებისაგან, მავნე სუნისაგან და სხვა.

პირველადი გასუფთავების ფილტრი (ბადისებრი ფილტრი) ასუფთავებს ჰაერს მტვრის მსხვილი ნაწილაკებისაგან, ის იწმინდება და ირეცხება დაბინძურების მიხედვით (საშუალოდ 2 კვირაში ერთხელ). დამატებითი ფილტრები შეიძლება იყოს ელექტროსტატიკური, ნახშირის ფილტრი, ბიოფილტრი, Silver ion ფილტრი, კატეხინური ფილტრი (მწვანე ჩაის ექსტრაქტით), ფილტრი C ვიტამიჰით და სხვა. ამ ფილტრების საშუალებით იფილტრება ჰაერი სხვადასხვა მიკრობებისა თუ მავნე სუნისაგან. ასეთი ფილტრები ძირითადად გააჩნია სპლიტ სისტემის კონდიციონერებს. ფილტრების შეცვლის ვადა შეიძლება იყოს საშუალოდ 6 თვიდან 2 წლამდე.

არის ასევე კონდიციონერები იონიზატორით.

გამოიყოფა უარყოფითად დამუხტული იონები და ანეიტრალებს დადებითად დამუხტულ იონებს, ჰაერი უფრო მსუბუქია და გაადვილებულია სუნთქვა. ასევე ხელს უშლის ბაქტერიების და ვირუსების გავრცელებას.

6. ჰაერის ნაკადის რეგულირება

ჰაერის დაბერვის სიმძლავრის და მიმართულების რეგულირების შესაძლებლობა წარმოადგენს დიდ პლიუსს კონდიციონერის შერჩევისას. პარამეტრების რეგულირება ხელს გვიწყობს ჩვენთვის კომფორტული გარემოს შექმნაში.

ჰაერის ნაკადის სიმძლავრე იზომება კუბურ მეტრებში საათში, ან წუთში და გვიჩვენებს ჰაერის სიჩქარეს და რაოდენობას, რომელიც გაივლის შიდა ბლოკში. რაც უფრო მეტია ეს მაჩვენებელი, მით მეტია ჰაერის დაბერვის სიმძლავრე. უფრო ხშირად კონდიციონერებში გამოიყენება ჰაერის დაბერვის 3 რეჟიმი (დაბალი, საშუალო, ძლიერი)+ავტომატური, ზოგიერთ შემთხვევაში დამატებულია ,,TURBO" რეჟიმი (უფრო გაძლიერებული დაბერვა). ასევე შეგვიძლია ვარეგულიროთ ჰაერის ნაკადის მიმართულება, ვერტიკალური და ჰორიზონტალური ჟალუზების საშუალებით. გაგრილებისას ჰაერის ნაკადი უნდა მივმართოთ მაღლა (არ უნდა მოხდეს უშუალოდ ადამიანზე დაბერვა), გათბობისას კი დაბლა, რადგან სითბო ადის მაღლა. ძირითადად სპლიტ სისტემის კონდიციონერებში ჰორიზონტალური ჟალუზების რეგულირება შესაძლებელია ავტომატურად ზევით-ქვევით, ხოლო ვერტიკალურის-ხელით.

7. ავტომატური რეჟიმი

კონდიციონერების უმრავლესობას გააჩნია მუშაობის ავტომატური რეჟიმი. ჩვეულებრივ გაგრილების, ან გათბობის რეჟიმში მუშაობისას ჩვენ შეგვიძლია ვარეგულიროთ, როგორც ტემპერატურა, ასევე ჰაერის დაბერვის სიმძლავრე. ავტომატურ რეჟიმში მუშაობისას ჩვენ ვუთითებთ მხოლოდ ტემპერატურას, კონდიციონერი თვითონ არეგულირებს ჰაერის დაბერვის სიმძლავრეს ოთახში არსებულ ტემპერატურასა და მითითებულ ტემპერატურას შორის სხვაობის მიხედვით, თუ დიდია სხვაობა, შესაბამისად დაბერვის სიმძლავრე გაიზრდება და თუ მცირეა-შემცირდება. ასევე კონდიციონერი თვითონ შეარჩევს რეჟიმს (გაგრილება, გათბობა, ვენტილაცია) მითითებული და არსებული ტემპერატურის მიხედვით. თუ მითითებული ტემპერატურა მეტია ოთახში არსებულზე, მაშინ ჩაირთვება გათბობის რეჟიმი და თუ ნაკლებია-გაგრილების რეჟიმი.

8. დამატებითი ფუნქციები და ტექნოლოგიები

სპლიტ სისტემის კონდიციონერები შეიძლება განსხვავდებოდეს როგორც დიზაინით, ასევე ფუნქციებით და ტექნოლოგიებით. შეიძლება იყოს ინვერტორული მართვით (განვიხილეთ ზემოთ), იონიზატორით და სხვა.

ზოგიერთი კონდიციონერის კონდესატორი (გარე ბლოკში) შეიძლება იყოს ალუმინირებული, ან ოქროს მტვრით დაფარული (ტექნოლოგია ,,Golden Tech"), რომელიც იცავს დაჟანგვისაგან.

თანამედროვე კონდიციონერები იმართება დისტანციური მართვის პულტით, რომლის საშუალებითაც შეგვიძლია ვარეგულიროთ ტემპერატურა, მივუთითოთ რეჟიმები, ჩართვის ან/და გამორთვის დრო, ასევე გავააქტიუროთ სხვადასხვა დამატებიტი ფუნქციები, მაგ: გავააქტიუროთ ღილაკი ,,Follow me" (ასეთის არსებობის შემთხვევაში), ამ შემთხვევაში ოთახის ტემპერატურის გაზომვა ხდება პულტში ჩამონტაჟებული სენსორის საშუალებით, რომელიც ყოველ 3 წუთში გადასცემს ინფორმაციას კონდიციონერის ძირითად მოდულს, ანუ ჩვენთვის სასურველი ტემპერატურა რეგულირდება იმ წერტილში, სადაც დევს მართვის პულტი (მაგ: სადაც ჩვენ ვზივართ). ამისათვის საჭიროა ორი პირობის შესრულება: 1. მართვის პულტსა და კონდიციონერს შორის არ უნდა იყოს რაიმე ბარიერი; 2. დაშორება არ უნდა აღემატებოდეს 8 მეტრს.

Kondicioneris SeZenisas aseve gasaTvaliswinebelia

  • კონდიციონერის ძირითადი დანიშნულებაა გაგრილება, მათ უმრავლესობას გააჩნია ასევე დამატებითი (დამხმარე) რეჟიმი „გათბობა", მაგრამ მისი ეფექტურობა იკლებს გარე ტემპერატურის კლებასთან ერთად, ნეგატიურად მოქმედებს ჰაერის ტენიანობის მატებაც. ასევე შენობაში ტემპერატურა გათბობის რეჟიმის ჩართვისას არ უნდა იყოს 16 0C-ზე დაბალი. ამიტომ საჭიროა გათბობის ალტერნატილი წყაროს არსებობა.
  • კონდიციონერის საშუალებით ოთახის გაგრილებისას რეკომენდებულია მითითებულ (ოთახის) ტემპერატურასა და არსებულ გარემო ტემპერატურას შორის სხვაობა არ აღემატებოდეს 12-15 0C-ს (ტემპერატურის მყისიერი ცვალებადობა, განსაკუთრებით დიდი სხვაობით, მავნებელია ჯანმრთელობისთვის). ზოგადად ადამიანისთვის მისაღები, კომფორტული ტემპერატურა არის 24 0C.
  • დანადგართან ახლოს ნუ გამოიყენებთ აალებად აეროზოლებს, ლაქს, ან საღებავს. ამან შეიძლება აალება და ხანძარი გამოიწვიოს.
  • კონდიციონერს ნუ ამუშავებთ ნესტიან ოთახში, როგორიცაა აბაზანა, ან სარეცხი ოთახი. ამან შეიძლება გამოიწვიოს თერმო შოკი და დანადგარის მწყობრიდან გამოსვლა.
  • რეგულარულად უნდა გაიწმინდოს დანადგარი, ძირითადი ფილტრები (2 კვირაში ერთხელ). დროულად შეიცვალოს მიკრო ფილტრები (იხ. მოხმარების ინსტრუქცია). გაიწმინდოს თბოგამცვლელი, ვენტილატორი და სხვა აქსესუარები.
  • გასუფთავებამდე გამორთეთ დანადგარი დენის წყაროდან.
  • არ დაბლოკოთ ჰაერის შემშვები და გამომშვები არხები.
  • კონდიციონერის მუშაობისას არ უნდა იყოს ღია კარი და ფანჯრები. კარგი თბოიზოლაცია ზრდის გაგრილება/გათბობის ეფექტურობას.
  • აუცილებელია ფართის პერიოდული განიავება. (განიავების პერიოდში კონდიციონერი უნდა იყოს გამორთული).
  • ჰაერის ნაკადი არ უნდა იყოს მიმართული უშუალოდ ადამიანებზე, ან/და ცხოველებზე.

მონტაჟი:

  • კონდიციონერის მონტაჟი და სარემონტო სამუშაო უნდა განხორციელდეს ავტორიზებული დილერის მიერ. არასწორმა მონტაჟმა შესაძლოა გამოიწვიოს წყლის გაჟონვა, ელექტრო შოკი, ან ხანძარი.
  • კონდიციონერის გარე ბლოკი არ უნდა დამონტაჟდეს დახურულ სივრცეში.

 

სხვა რჩევები
როგორ ავარჩიოთ LCD (თხევადკრისტალური) ტელევიზორი
როგორ ავარჩიოთ LED ტელევიზორი
როგორ ავირჩიოთ 3D ტელევიზორი
როგორ ავირჩიოთ პლაზმური ტელევიზორი
როგორ ავირჩიოთ ციფრული ფოტოაპარტი
როგორ ავირჩიოთ ვიდეოკამერა
როგორ ავარჩიოთ DVD პლეერი
როგორ ავარჩიოთ Blu-ray პლეერი
როგორ ავირჩიოთ სახლის კინოთეატრი
როგორ ავირჩიოთ მობილური ტელეფონი
როგორ ავირჩიოთ რადიოტელეფონი
როგორ ავარჩიოთ ნოუთბუქი
როგორ ავირჩიოთ მონიტორი
როგორ შევარჩიოთ კომპიუტერის კომპონენტები
როგორ ავარჩიოთ პრინტერი
როგორ ავირჩიოთ მაცივარი
როგორ ავირჩიოთ სარეცხი მანქანა
როგორ ავირჩიოთ ჭურჭლის სარეცხი მანქანა
როგორ ავირჩიოთ ქურა
როგორ შევარჩიოთ გამწოვი
როგორ შევარჩიოთ წყლის გამაცხელებელი
როგორ შევარჩიოთ ელექტრო ღუმელი
როგორ შევარჩიოთ გამათბობელი
როგორ ავარჩიოთ მტვერსასრუტი
როგორ შევარჩიოთ გამათბობელი
როგორ ავირჩიოთ გაზქურის ზედაპირი
საიტის სრული ვერსია